短期內最後一個關於書嘅活動，下周日長州渡日書店，傾閒計為主。
跟渡日結緣，始於兩個字：「拉擠」。
去年七月某日，「渡日」還未誕生，S和J可能知我家係水上人，忽找我問有冇聽過「拉擠」（第一字大約讀像英文的”light”，technical少少嘅話係 ［lai1 zai1] ）。
我話梗有，我阿嫲以前成日講，「好細」咁解，阿嫲講時仲成日係有個突出小小手指尾嘅手勢。問下去，原來他們幾個朋友正打算在長州開書店，對這些語言很感興趣，由是引發我諗返聽過阿嫲講嘅嘢，傳了他們一個題為「長州賓客」嘅電郵，剛搵返：
// 1.「船頭不漏針，唔喺慢慢尋。」我阿爸都喺係艇大，十幾歲先上樓，同我阿爺都係揸左一世船（佢地講「車船」，唔係「揸船」），到我先至背叛祖業。
2.「早知燈係火，唔駛四圍摸。」
3. 阿嫲閙人有一句係「死絕！」或「死絕仔！」，我都冇聽過其他人咁講，覺得幾搞笑。但佢唔係typical有隻金牙個種。
4. 唔知點解，我阿嫲係唔講「冚家鏟」，而講「冚家唱」、「佢個冚家唱」-- 應該係「冚家祥」，但個「祥」佢會mer mer地咁讀（可能唔係幾發到個音）就變成「唱」-- 因為覺得正，我大咗有時都咁講。//
由細到大到每年都去長州拜山，一路以為家族些有長州背境。結果有晚回家食飯時一問，才知係冇，阿嫲嗰陣原來只係覺得長州個墳風水好，景色美，唔知用咩方法問人借咗個地址返嚟，所以阿爺先至葬入去，真係背山面海好好景。
近兩年唔少朋友住入長州，久唔久入去，有次試下憑記憶搵返阿爺以前個墳，咁多年冇去（因收骨後搬走咗），仍然記得八九成，de javu一樣。
收爐嘅talk在長州搞，仲要在朋友嘅書店、同朋友們一齊傾吓，真係十分之fit。渡日書店頗拉擠，非但唔係壞事仲更cosy，而當初問我「拉擠」、自己也有造書同排書嘅友人S都話，可能會在收銀機後join in ，哈。
--------------------------------------------------------------------
【31/7 活動】郭梓祺來渡日閒聊 🌞
剛出版新書《一道門》的作家郭梓祺最近常到不同書店分享，多到他自己笑言：「這兩個月『出現』嘅程度已遠遠超越人生頭四十年總和，唔知會否有人懷疑我有咗絕症。放心，暫時冇，只係試下盡力啲：）」
「盡力」的他月尾會嚟到長洲，與大家閒聊一下，講吓神話，同場仲有區華欣同渡日書店老闆之一阿琳一齊傾下出書寫書 📖✍️
活動詳情：
日期：31/7（日）
地點：渡日書店
🐯16:30-17:00 「講吓美洲神話」 （Galeano’s Memory of Fire)🦁
神話是一個群體對世界的原初解釋，希臘或中國的聽得多，今次會抽烏拉圭作家加萊亞諾（Eduardo Galeano)在《火之記憶》提及的幾則美洲神話來說說。
講者：郭梓祺
---
📖 17:00-18:00 「點解會寫嘢、想整書」🖊
幾位朋友都前後出了書，今次會講講為何會寫嘢，還用書這形式去裝住想表達的東西，圍繞這些主題傾吓計。
講者：
周翊琳（渡日書店老闆之一，著有《日落午睡》、近著有詩集《孩子開的洞》）
區華欣（著有《蟾蜍夢多》、漫畫《螳螂短打》）
郭梓祺（著有《積風集》和《無腔曲》等，近著有《一道門》）
活動費用：自由定價
**書店空間有限，敬請報名預留位置。
No comments:
Post a Comment